預報員衝上雲霄

星期三, 2018年4月18日

天氣預報員無論身處何方、放假與否，有時會出現某種程度的「職業病」。今次讓我們看看預報員乘搭飛機時，與一般人不同的思考方式……

候機時
一般人：「上機之前，等我睇吓有乜嘢免稅品可以掃先！」
預報員：「上機之前，等我睇吓機場同事發出嘅機場天氣報告（METAR）同預報（TAF）先！」

飛機起飛時
一般人：「嘩！我哋飛咗上啲雲上面呀！」
預報員：「目測天晴，有四份低雲，雲底高度3000呎，幾乎冇中雲同高雲。」（雲的分類與命名）

吃飛機餐時
一般人：「唉，又要食啲咁難食嘅飛機餐……」
預報員：「機艙裡面嘅濕度同埋氣壓變化都會影響我哋對食物嘅味覺同嗅覺。話時話，其實都唔係咁難食吖。」（為何飛機餐味道總是淡淡的？）

快到目的地時
一般人：「唔知目的地而家凍唔凍呢？使唔使著多件衫呢？」
預報員：「根據屏幕上嘅資料顯示，而家身處8000米高空，外面氣溫係攝氏零下32度。由於平均每上升1000米，氣溫就遞減大約攝氏6度，所以地面氣溫大概會比呢度高48度左右，估計約16度。」（高處不勝寒）

降落時
一般人：「地面啲屋仔細細間，好似玩具咁，好得意呀！」
預報員：「好清楚睇到地面啲屋仔，垂直和水平能見度都良好，降落條件唔錯喎！」（能見度降低影響航班運作）

莊思寧